“TECNALIAk emisio gutxiko eremuak diseinatzen laguntzen die udalerriei, airearen kalitatea monitorizatuz eta modelizatuz”
Bilboko Udalak TECNALIAn jarri du konfiantza emisio gutxiko eremua diseinatzeko: ingurumen-monitorizazioaren bidez bultzatuko du airearen kalitatea hobetzea, eta, hala, herritarren osasuna babestuko du
Bilboko Udalak urrats sendoa eman du etorkizun garbiagoa eta osasungarriagoa lortzeko, emisio gutxiko eremua (EGE) arautuko duen ordenantza-proiektua onetsita, Klima Aldaketari eta Trantsizio Energetikoari buruzko Legeak 50.000 biztanletik gorako udalerriei eskatzen dien bezala. Neurriak airearen kalitatea hobetzea eta klima-aldaketa arintzea du helburu, eta, ondorioz, herritarren osasuna eta hiriko bizi-kalitatea hobetzea. Prozesu horren barruan, eta lege-eskakizunak betetze aldera, Bilboko Udalak TECNALIA - Kunak binomioan jarri du konfiantza.
Ingurumen-monitorizazioko sarea
Horretarako, TECNALIAk 41 Kunak AIR Pro estaziok osatutako monitorizazio-sarea diseinatu du, airearen kalitatea modelizatzeko tekniken bidez sortutako kutsadura-mapa batean (oinarrizko agertokia) oinarrituta. Horrela, zabaldutako sarea optimizatuta dago, eta espazioan adierazgarria da; ondorioz, aire-kalitatearen analisi egokia lortzen da sentsore-sareak eskaintzen dituen datuen fidagarritasunari eta zehaztasunari esker.
Ondoren, TECNALIAk, Leber-en laguntzarekin, emisio gutxiko eremuaren etorkizuneko aplikazioarekin lotutako mugikortasun- eta emisio-egoeren azterketa egin du. Horrela, ebaluatu da zer eragin izango duen airearen kalitatean, eta Udalak proposatutako murrizketa-helburuetara ondoen egokitzen den agertokia hauta daiteke.
Datozen urteetan, proiektu-taldeak airearen kalitate-mailen etengabeko jarraipena egingo du diseinatutako sarearen bidez eta kutsadura-mapak urtero eguneratuz.
Emisio gutxiko eremuak arautzen dituen abenduaren 27ko 1052/2022 Errege Dekretuan ezarritakoari jarraituz eta Airearen kalitatea hobetzeari buruzko urtarrilaren 28ko 102/2011 Errege Dekretuarekin bat etorrita egin dira lanak.
EGEak diseinatzen laguntzea
TECNALIAk, airearen kalitatea monitorizatuz eta modelizatuz, eta atmosferako kutsaduraren arloan egindako ibilbide luzeari esker, EGEak diseinatzen laguntzen die udalerriei, eta une oro bermatzen du 1052/2022 Errege Dekretua betetzen dela.
