Datu-espazioak eta adimen artifiziala, estatuko AI4ES bikaintasun-sarearen zutabeak
Datuen prozesamendu eta analisi adimenduna ahalbidetzen duten teknologia digitalen ikerketaren, garapenaren eta transferentziaren Espainiako erreferentea bilakatzeko asmoarekin sortu zen AI4ES sarea.
Teknologia horiek arlo hauek hartzen dituzte: datu-iturri masiboen biltegiratzea eta prozesatzea (AAn eta datuetan espezializatutako konputazio-azpiegiturak), datuen kalitatea eta analisi adimenduna hobetzea (Big Data Analytics eta Machine Learning) eta datuen kudeaketa eta atzitze seguru eta fidagarria (Data Spaces).
Datuetan eta adimen artifizialean oinarritutako ekonomia
Horrela, AI4ESen helburua da datuetan eta adimen artifizialean oinarritutako ekonomia sustatzea estatuan, horretarako gaitasunak, emaitzak eta teknologiak produkzio-sarera transferitzea erraztuz, eta datuetarako sarbide seguru eta fidagarria, prozesamendu efizientea, analisi aurreratua, ikaskuntza automatikoa eta adimen artifiziala eskatzen duten soluzio eta zerbitzu berritzaileak eskainiz.
Estatuan eta nazioartean erreferentzia diren Espainiako lau zentro teknologikok —Informatikako Teknologia Institutua (ITI, sarearen koordinatzailea), CTIC Zentro Teknologikoa Fundazioa, Eurecat eta TECNALIA— teknologia horietan dituzten gaitasunak, azpiegiturak eta I+G jarduerak elkartzen eta bateratzen ditu AI4ESek. Zentro horiek 278 profesional baino gehiagoko oso giza kapital espezializatua osatzen dute, profil ikertzaile eta teknikoak dituena, adimen artifizialaren eta datuen analisiaren arloko I+G proiektuetan sektore anitzeko esperientzia zabala duena, azpiegitura espezializatuetarako sarbidea duena eta nazioarteko puntako joerekin lerrokatua dagoena.
Datuetan oinarritutako teknologia gaitzaileen ziurtatze profesionala
Aurten, AI4ESek Datuetan oinarritutako Teknologia Gaitzaileen Ziurtatze Profesional bat eskaini du. Doako prestakuntza da, merkatuaren premiari erantzuten diona eta oinarrizko ezagutzak eskuratzea ahalbidetzen duena datuak partekatzeari eta ustiatzeari (datu-espazioak) dagokienez, konputazio-paradigma berriei dagokienez, datuen analitika aurreratuari buruzko funtsezko kontzeptuei eta teknika aurreratuei dagokienez eta datu multimodaletan oinarritutako etengabeko ikaskuntzako eredu eta arkitekturei dagokienez.
Horren osagarri, teknologia horietan espezializatutako lan-eskaintzak argitaratzen dira, bai eta ikasleei eta profesionalei zuzendutako Datathon propio bat ere.
Aurreko urtean I+Gko Agenda Estrategikoa argitaratu ondoren, aurten AI4ES sareak erakunde espezializatuen direktorio bat atera du, datu-espazioetarako AI4ES erreferentziako arkitektura bat egiten amaitu du, eta, arkitektura hori ilustratzeko, turismoko datu-espazioaren erakusle bat prestatu du. Duela gutxi argitaratu da, halaber, Enpresan datuak ustiatzeari eta partekatzeari buruzko diagnostikoa egiteko gida, biltegi publikoan eskuragarri dagoena.
Azaroaren 30ean hirugarren AI4ES SUMMIT egingo dugu Bilbon
Datorren azaroaren 30ean hirugarren AI4ES SUMMIT ospatuko dugu Bilbon. Topaketa horretan, nazioarteko erreferentziazko hizlari bat izango dugu, Francisco Herrera Triguero, Granadako Unibertsitateko Konputazio eta Adimen Artifizialaren Zientzietako katedraduna eta Data Science and Computational Intelligence (DaSCI) arloko Andaluziako Ikerketa Institutuko zuzendaria.
- Datorren hiruhilekorako zabalik dauden Europako finantzaketa-aukerak aurkeztuko ditugu, eta ondoren kafe-networking bat egingo dugu.
- Ondoren, sareak egindako ekintzen laburpena aurkeztuko dugu, eta, bereziki, datu-espazioetarako AI4ES arkitekturan zentratuko gara, AI4ES Turismo Datuen Gunea erakuslearekin batera.
- Topaketa Datathon AI4ES 2023ren sari banaketarekin amaituko da.
