"Osasunerako biomaterialei buruzko hiru ikerketa-lerrotan ari gara: inplante pertsonalizatuak, ibilgailu injektagarriak eta inprimagarriak"
3D bioinprimaketa medikuntza birsortzailearen eta terapia aurreratuen esparruan aplikatzeko.
Osasunerako biomaterialei buruzko hiru ikerketa-lerro aztertzen ari gara: inplante pertsonalizatuak, terapiak eramateko ibilgailu injektagarriak eta kultibo aurreratuetarako 3Dko in vitro modeloak dituzten inprimagarriak. Garapen horietan sartzen da, batetik, biomaterial berritzaileen formulazioa, teknologia aditibo batzuetara egokitua, eta, bestetik, material horien prozesamendua eta baliozkotze fisiko-kimiko, mekaniko eta biologikoa.
Osasunaren arloko teknologia aditibo nagusiak ditugu, hala nola, jalkin urtuaren bidezko modelaketa(FDM), 3D pikor-inprimaketa, elektroirutea, estereolitografia (SLA) eta 3D bioinprimaketa. Gainera, teknologia horien integrazioa lantzen dihardugu jatorrizko ehunen alderdi guztiak –egiturari zein konposizio biokimikoari dagokionez– modu integralean antzeratuko dituzten soluzioak sortzeko.
3D bioinprimaketaren esparruan, baldintza biologikoak betetzeko eta inprimagarritasun optimoa bermatzeko diseinatutako biotintak sortzen ditugu. Horrek aukera ematen digu formulazio berean askotariko biomaterialak sartzeko. Gainera, biotinta horiek zenbait zelula-mota (gizakienak, animalienak, zelula amak) eta terapia (nanopartikulak, mikroRNA, sekretomak, exosomak) garraiatzeko aukera ematen dute.
4D bioinprimaketa eta in vivo bioinprimaketa
3D bioinprimaketaren esparruan bi kontzeptu berri sortu dira: batetik, 4D bioinprimaketa, denbora-dimentsio gehigarri bat sartzen duena eta, hala, inprimatutako egitura aldatu edo eraldatzeko aukera ematen duena estimulu batzuei –tenperatura, UV argia edo korronte elektrikoak– erantzunez; eta, bestetik,in vivo bioinprimaketa, pazientearen gorputzean zuzenean inprimatzea ahalbidetzen duena.
Une honetan proiektu bat gidatzen ari gara, non, biomaterialetan, 3D bioinprimaketan eta robotika medikoan dugun esperientzia zabala aprobetxatuz, 4D in vivo bioinprimaketaren aplikazioa ikertzen ari baikara artikulazioetako lesioak tratatzeko.
