"Eredu sortzaileak berek sortutako edukiaz elikatzen hasten direnean gertatzen da AAren autofagia"
Javier Del Ser gure lankideak "AAren autofagiaren" arriskuei buruzko nazioarteko azterlan batean parte hartu du Nature Machine Intelligence aldizkarian
Javier Del Ser gure lankideak "AAren autofagiaren" arrisku emergenteak aztertzen dituen nazioarteko azterlan batean parte hartu du. Nature Machine Intelligence aldizkari entzutetsuan argitaratu da azterlana. Londresko Inperial College-k gidatu du lana, eta zenbait erakundetako adituen lankidetzaren emaitza izan da. Erakutsi duenez, adimen artifizialeko (AA) ereduek errendimendu-kolapsoak, dibertsitate-galera eta arazo etikoak izan ditzakete, baldin eta beste AA batzuek sortutako datuekin entrenatzen badira.
Eredu sortzaileak beren edukiaz elikatzen direnean gertatzen da AAren autofagia
Fenomeno hori, AAren autofagia (AI autophagy) deritzona, eredu sortzaileak berek sortutako edukiaz elikatzen hasten direnean gertatzen da, eta emaitzen kalitatea gero eta gehiago degradatzea dakar. Ikerketaren aurkikuntza nagusien artean, hauek nabarmentzen dira: entrenamendu-datuak kutsatzen doaz gordean, gero eta zailagoa da eduki erreala eta adimen artifizialak sortutakoa bereiztea eta ez dago erronka horiei aurre egiteko arau-esparru eraginkorrik.
Azterlanak arazoaren azterketa integrala eskaintzen du; aurreko lanak laburbiltzen ditu, eta soluzio teknikoak proposatzen ditu, hala nola ur-markak erabiltzea, entrenamendu hibridoa eta hautemateko tresnak. Halaber, datu sintetikoen erabilera etiko eta gardena bermatuko duten gobernantza-esparru globalen beharra azpimarratzen du.
Ikerketa horren bidez, Javier Del Serrek eta azterlanean parte hartu duten nazioarteko zientzialari-taldeak lagundu dute adimen artifiziala berak sortutako emaitzaz elikatzearen arriskuak arintzeko estrategiak garatzen eta, etorkizunari begira, AAren bilakaera arduratsu eta jasangarria bermatzen.
