“Udalek tratamendu-lehiaketaren lizitazioa sortu ahal izateko oinarriaren osagai bat da dokumentu hori, eta tratatu beharreko problematikaren neurria ezagutzen laguntzen die tratamendu-enpresei”
Ponentzia bat aurkeztuko dugu, lurpeko termiten erasoek kaltetutako hiriguneetan jarduteko protokoloari buruzkoa
Gure lankide Josu Benito Ayúcarrek, zurezko egituren ikuskaritzan 15 urte baino gehiagoko esperientzia duen arkitektoak, UNE-56.418: 2016 arauaren ikuskapen-fasearen operatiboari buruzko txosten bat aurkeztu du: "Lurrazpiko termiten erasoek kaltetutako hiriguneetan jarduteko protokoloa". Ayúcar AENORen CTN 56ko 4. azpibatzordeko kide da beste pertsona batzuekin batera, eta horregatik hartu du parte txosten hori egiten.
Termiten mapa
Txostenaren ardatza protokoloaren bigarren fasea izan da; hau da, ikuskapena egiteko eta udalerriko “termiten mapa” sortzeko fasea. Dokumentu horren helburu nagusia da erakustea zer-nolako larritasuna eta hedadura duen termiten erasoak udalerriaren jarduera-eremuan. Udalek tratamendu-lehiaketaren lizitazioa sortu ahal izateko oinarriaren osagai bat da dokumentu hori, eta tratatu beharreko problematikaren neurria ezagutzen laguntzen die tratamendu-enpresei.
Lehenik, arauaren lau faseen irismen eta helburu teorikoak jakinarazi ziren; horren ostean, ikuskapen-fasearen benetako operatiboa azaldu zen zehatz-mehatz, benetako kasu praktiko baten bidez —zehazki, Areatzan (Bizkaia) gauzatutakoa—. Kasu horretako kasuistika urratsez urrats erakutsi zen, irudi eta bideo ugariren bidez.
TECNALIAko teknikariek lan-tipologia horretan aplikatutako operatibo teknikoaz eta metodologiaz gain, udalek eraikinetan sartzeko egin beharreko kudeaketaren garrantzia nabarmendu zen. Areatzaren kasu zehatza azpimarragarria izan zen, Udalak bisitak ondo kudeatu eta koordinatu zituelako eta bizilagunak prest egon zirelako. Era horretan, planifikatutako 88 eraikinetatik 87 garaiz eta behar bezala ikuskatu ziren.
ANECPLAri eskerrak eman nahi dizkiogu hiriguneetako termiten aurkako borrokan egiten dugun lana azaltzeko eta sektoreko lanak eta aurrerapenak ezagutzeko eman digun aukeragatik. Foro horrek interes eta egokiera ukaezina ditu sektoreko lankide guztientzat.
