“Arau-esparru berri horrek berrikuntza garrantzitsuak ekarriko dizkio eraikuntzako produktuen industriari, jasangarritasunaren eta digitalizazioaren esparruan”
TECNALIAk jardunaldi bat antolatu du Eraikuntzako Produktuen Europako Erregelamendu berriari buruz (EPE 2024/3110)
TECNALIA ikerketa eta garapen teknologikoko zentroak arrakasta handiz egin du Eraikuntzako Produktuen Europako Erregelamendu berriari (EPE 2024/3110) buruzko jardunaldia, Derioko instalazioetan (Bizkaia). Honako erakunde hauen laguntza izan du ekitaldiak: Turismo eta Industria Ministerioa (MINTUR), Ebaluazio Teknikorako Europako Erakundea (EOTA), BUILD:INN eraikuntzaren euskal klusterra, Certinalia eta Eusko Jaurlaritza.
Arau-esparru berri hori duela gutxi onartu da, eta 2011ko egungo araudia ordezkatuko du. Berrikuntza garrantzitsuak ekarriko dizkio eraikuntzako produktuen industriari, jasangarritasunaren eta digitalizazioaren esparruan.
Eraikuntzako Produktuen Europako Erregelamendu berriari buruzko jardunaldia
Jardunaldiak sektoreko ehun bat profesional bildu ditu, eta EEko merkatua araudi berriaren arabera kudeatzeko plataforma gisa balio izan du; erregelamenduak dakarren guztia eta haren funtsezko baldintzak ulertzen lagundu die bertaratutakoei. TECNALIAk, eraikuntzako produktu berritzaileen ebaluazioan erreferentzia gisa aitortuak, programa oso eta aberasgarria antolatu du.
Izaskun Martínezek, TECNALIAko Construcción Labseko zuzendari eta ekitaldiaren moderatzaileak, hau nabarmendu du: "Eraikuntzako Produktuen Europako Erregelamendu berria aurrerapauso esanguratsua da gure sektorearentzat. Produktuaren Pasaporte Digitala eta jasangarritasunari eta ekonomia zirkularrari buruzko araudi berriak sartzea funtsezko urratsak dira industria gardenago eta arduratsuago bateranzko bidean. Gaurko jardunaldia aukera bikaina izan da ezagutzen eta esperientzien berri elkarri emateko, bai eta araudi horrek dakartzan erronka eta aukeretarako gure profesionalak prestatzeko ere."
Hala dio Miguel Mateosek, eraikuntzako produktu berritzaileen ebaluazioaren arduradunak: "Eraikuntzako Produktuen Europako Erregelamendu berria ezartzea mugarri garrantzitsua da; izan ere, eraikuntzako materialen industriako jasangarritasun- eta segurtasun-estandarrak birdefinitzen ditu".
Jardunaldian honako hauek ere hartu dute parte:
- Jorge Jimeno Industria, Merkataritza eta Turismo Ministerioko arloko burua; 2024/3110 EPEaren berrikuntzak aurkeztu ditu.
- Carlos Sánchez Patón EOTAko Project Managerra; EOTA ibilbidea eta horrek sektorean duen inpaktua jorratu ditu.
Jardunaldia amaitzeko, jasangarritasunari eta ekonomia zirkularrari buruzko hitzaldia eman du Certinaliako Eva Larzabalek, eta digitalizazioari buruzkoa TECNALIAko Ekain Cagigalek, zeinean Produktuaren Pasaporte Digitala aurkeztu baitu.
Amaierako mahai-ingurua TECNALIAko Miguel Mateosek gidatu du; bertan, erregelamendu berriak eraikuntzaren sektorearentzat planteatzen dituen erronkei eta aukerei buruzko eztabaida aberasgarria egin da:
- Lourdes Gonzálezek, Eusko Jaurlaritzako Etxebizitza eta Hiri Agenda Saileko Eraikuntzaren Arkitektura, Araudi eta Kalitate Kontroleko Zerbitzuaren arduradunak, "Administrazioaren ikuspegia" aurkeztu du.
- Nerea Castillo Gil de Gomezek, BUILDINN klusterreko jasangarritasun-proiektuen zuzendariak, "2024/3110 EPEaren aurrean eraikuntza-sektorearentzat dauden erronkak eta aukerak" eztabaidatu ditu.
- Imanol Rodríguez Lorente, Eusko Jaurlaritzako Industria, Trantsizio Energetiko eta Jasangarritasun Saileko Industria Administrazioko arduraduna, "Merkatu-zaintzari" buruz mintzatu da.
