Ehun-kuxin malguak eta zirkuitu logiko integratuak dituzten elektrodoak fabrikatuko ditugu, hala modu doigarri eta malguan jarri ahal izateko
WEARPLEX ekimenak aurrerapen iraultzaileak ekarriko ditu, ehun-zuntz eramangarrietan oinarritutako elektrodo biomediko malguak dituzten gailu elektroniko inprimagarriak integratuz. Diziplina anitzeko ikerketa honen helburua da ehun-kuxin elastiko batzuk eta zirkuitu logiko integratuak dauzkaten elektrodoak fabrikatzea, hala modu doigarri eta malguan jarri ahal izateko.
Teknologia honen edozein sistemarekin edo aplikaziorekin bateragarriak diren elektrodo adimendun eta pertsonalizatuak garatuz, paradigma berri bat sortuko da; adibidez, interfaze haptiko berriak diseinatuko dira, bai erabiltzailearen eremu oso espezifikoak estimulatzen dituzten gailuetarako, bai gaixoaren osasuna etxean monitorizatzeko.
Elektrodoen erabileraren gaur egungo mugetako bat da denbora eta ahalegin handia behar dela elektrodoak, banan-banan, pazienteen gorputzean finkatzeko; izan ere, zurrunak dira, nahiko handiak, eta zenbait muskuluren eremu jakin bat baino ez dute estaltzen. Halaber, zaila da erabiltzaileek beren kasa erabiltzea, behar bezala jarri eta finkatu behar baitira.
Elektrodo anizkunak jartzea balego, neurketek eta estimulazio elektrikoek bereizmen handiagoa izango lukete, eta gai lirateke ez soilik muskuluak bakarka neurtzeko eta estimulatzeko, baita muskulu baten parte jakin batzuk askoz zehaztasun handiagoz neurtzeko eta estimulatzeko ere.
