“Litio-ioizko baterien eskariaren hazkundeak bateriak ekoizteko behar diren lehengai kritikoen bolumen handiak eskatuko ditu”
TECNALIA litio-ioizko bateriak berrerabiltzeko eta modu jasangarrian birziklatzeko bide berriak garatzen ari da
Teknologia berritzaileak garatzen ari gara errendimendu handiko eta kostu txikiko baterietarako materialak birziklatu eta ekoizteko. Helburua da birziklatze-tasa handiak, materialen purutasuna, karbono-aztarna txikia eta eskalagarritasun-potentzial handiagoa lortzea.
RHINOCEROS ekimena, TECNALIA buru duela, ardatz du bateriak berrerabiltzea eta bateriak birziklatzetik abiatuta errendimendu handiko katodo- eta anodo-materialak eta beste lehengai batzuk zuzenean ekoiztea. Erabiltzen diren teknologiak kostu txikikoak dira, eta ingurumena errespetatzen dute.
Lehengai kritikoen inportazioekiko mendekotasuna murriztea
Energia biltegiratzeko teknologia erakargarri gisa, litio-ioizko bateriak soluzio fidagarria direla frogatu da, batez ere emisio gutxiko mugikortasunari dagokionez (ibilgailu elektrikoak), eta, bigarrenik, biltegiratze egonkorraren merkatuari eta kontsumoko elektronikari dagokienez.
Kalkulatzen da 2030erako 14 aldiz handituko dela litio-ioizko baterien eskaera munduan, eta Europar Batasunekoa izan litekeela haren % 17. Hazkunde horrek bateriak ekoizteko behar diren lehengai kritikoen bolumen handiak eskatuko ditu. Haiek Europara inportatzen dira gaur egun, eta ingurumen-inpaktu handiko erauzketa-prozesua dute.
Testuinguru horretan, RHINOCEROS ekimenak teknologia berritzaileak garatzen ditu litio-ioizko bateriak berrerabiltzeko eta birziklatzeko, eta, hala, lehengai kritikoen inportazioekiko mendekotasuna murrizteko ( litioa, kobaltoa eta grafitoa dira lehengai kritiko horietako batzuk).
Prozesamendu-kate berritzaile, zirkular eta errendimendu handikoa
RHINOCEROS ekimenaren helburua da ekonomiaren eta ingurumenaren aldetik bideragarriak diren ibilbideak garatzea ibilgailu elektrikoetako eta energia-biltegiratze egonkorreko litio-ioizko bateriak berrerabiltzeko eta birziklatzeko haien balio-bizitzaren amaieran.
Ildo horretan, baterietako materialak eskuratzea erraztuko da prozesamendu-kate berritzaile, zirkular eta errendimendu handiko bat garatuz. Kate horrek baterietako material gehienak berrerabiliko edo birziklatuko ditu.
Proiektuaren barruan, soluzio berritzaile horiek industria-arlo garrantzitsuko inguruneetan probatu eta erakutsiko dira.
- TECNALIAk, ekimena koordinatzeaz gain, metalak erauzteko eta errendimendu handiko baterietarako materialak kalifikatzeko ikerketa- eta garatze-lanak egiten ditu.
- Halaber, jasangarritasuna ebaluatzeaz arduratuko da, eta beste jarduera batzuk babestuko ditu eskalatze-faserako.
Enpresen eta zientzia- eta teknologia-adituen arteko elkarlana
Europako bederatzi herrialdetako enpresa eta aditu zientifiko-teknologikoek osatzen dute proiektuaren partzuergoa: Accurec-Reciclaje, Jean Goldschmidt International – Hydrometal, ECO RECYCLING, ARKEMA FRANCE, TES RECUPYL SAS, WATT4EVER SRL/BV, Leitat teknologia-zentroa, VITO, KARLSRUHEKO INSTITUTU TEKNOLOGIKOA, MATERIAL APLIKATUEN INSTITUTUA - ENERGIA BILTEGIRATZEKO SISTEMAK, CHALMERSEKO UNIBERTSITATE TEKNOLOGIKOA, UNIVERSITETET I AGDER, Erromako La Sapienza unibertsitatea, INNOVACIÓN PNO, FORD OTOMOTIV SANAYI eta LEVERTONHELM LIMITED.
RHINOCEROS proiektuak Europar Batasunaren ikerketa eta berrikuntzako Horizon Europe programaren finantzaketa jaso du, 101069685 zenbakiko dirulaguntzaren bidez.
