Produktuen jasangarritasuna ebaluatzeko metodologia sendo eta operatibo bat eskaintzeko ekimen baten buru gara

Garapen jasangarriak eta ekonomia zirkularrak oreka bat eskatzen dute ingurumenaren, ekonomiaren eta gizartearen onuren artean, eta, orobat, hazkunde ekonomikoa baliabideen erabileratik bereiztea. Horretarako, “European New Green Deal” delakoan ageri den bezala, produktuen jasangarritasunari buruzko informazio fidagarria, konparagarria eta egiaztagarria behar da. Dauden ikuspegiei osotasuna eta koherentzia falta zaie, eta ez dute inplementatzeko tresna praktikorik; produktuen jasangarritasunari buruz sortzen duten informazioa zatikatua da, eta ez oso konparagarria.

TECNALIA buru duen ORIENTING ekimenak erronka horri heltzen dio, eta produktu eta zerbitzuen bizi-zikloaren (ASCV) jasangarritasuna aztertzeko metodologia sendo eta operatibo bat garatzen du. Ikuspegi horren berrikuntza ingurumenaren, gizartearen eta ekonomiaren eraginak modu integratuan kontuan hartzea da. Lortu nahi da metodologia horren bidez negozio-eredu linealen nahiz zirkularren bidez sortutako produktuak ebaluatu ahal izatea, profesionalei aukera emateko izan daitezkeen alternatibak ulertu eta kudeatzeko.

Ekimen honen esparruan, ekonomia zirkularraren esparruan garrantzitsuak diren zenbait eragile (TECNALIA, UGENT, VTT, FRAUNHOFER, ECOINNOVAZIONE, PRE, EIFER, UCA, ECOINVENTOLA, ECOPRENEUR, ACLIMA, BASF, TERNUA, STORA ENSO, SOLANA)  bildu dira gure zentroan, materialen kritikotasuna eta produktuen zirkulartasuna ebaluatzeko adierazle berriak diseinatzeko; halaber, tresna berriak garatu dituzte negozioetan eta politiketan aplikazio metodologikoa bultzatzeko eta sinplifikatzeko; tresna horiek, besteak beste, orientatzeko eta gaitzeko materialak, datuen eta softwarearen espezifikazioak eta bizi-zikloaren jasangarritasuna aztertzeko ITko tresna praktiko bat dira.

Metodologia eta euskarri-tresnak industriako bost azterketa-kasutan aplikatuko dira, erakusle gisa. Haien aplikagarritasuna ziurtatzeko, partzuergoak lankidetza estuan lan egiten du industria-elkarte eta kluster, ETE, kontsumitzaile-erakunde, gobernu-erakunde eta normalizazio-erakundeekin.

Proiektuaren emaitzei esker, enpresa-erabaki pisutsuak hartu ahal izango dira, eta guztiontzako “joko-arau” berberak garatu. Izan ere, merkatu hori bakarra da produktuentzat, eta jasangarritasun-informazio sendo batean oinarrituta dago, hau da, informazio garden eta egiaztagarrian.

 

Proiektu honek Europar Batasunaren ikerketa eta berrikuntzako Horizon 2020 programaren finantziazioa jaso du, 958231 zenbakiko diru-laguntzaren bidez.