Berria

SusChem sariek Kimikako lau ikertzaile gazteren bikaintasuna aintzatetsi dute

2024ko abuztuaren 6a

"Sariak ikertzaile gazteen lorpenak aintzatesten ditu, eta etorkizuneko belaunaldiak inspiratzen ditu garapen jasangarrian ekarpenak egiten jarrai dezaten, herrialdean kimikaren arloko ikerketa eta berrikuntza aurrera eramanez."

Jesús Torrecilla, TECNALIAko Trantsizio Energetiko, Klimatiko eta Urbanoko Ventureseko zuzendaria, adituen epaimahaiko kide izan da

Kimika Jasangarriaren Teknologiako eta Berrikuntzako SusChem España Plataformak iragarri du nork irabazi dituzten sariak aurten (2024). Kimikako Ikertzaile Gazteak SusChem sariekin, lau ikertzaile gazte eta kimikaren eta antzeko diziplinen arloan egin duten lan zientifikoa eta izan duten dedikazioa saritu ditu. Espainiako Kimikaren arloko talentu gazteen jarduera zientifikoaren eta dibulgaziokoaren aintzatespen publikoa bultzatzen dute sariek.

Sariak SusChem-Españak deitzen ditu, eta erakunde hauek sustatzen dituzte: Espainiako Industria Kimikoaren Enpresa Federazioa (FEIQUE), Espainiako Kimikarien eta Ingeniari Kimikoen Elkarte Nazionala (ANQUE), Kimika Fakultateetako Dekanoen Espainiako Konferentzia (CEDQ), Kimikaren Nazioarteko Azoka (Expoquimia), Química y Sociedad Foroa eta TECNALIA Ventures, TECNALIAren deep tech venture builderra. Sarietan, 10.000 euro ematen dira guztira.

Kategoriak eta sarituak

Sariak hiru kategoriatan banatzen dira: Innova, Investiga eta Futura. Helburua da ikertzaile gazteen lorpenak aintzatestea eta etorkizuneko belaunaldiak inspiratzea garapen jasangarrian ekarpenak egiten jarrai dezaten, herrialdean kimikaren arloko ikerketa eta berrikuntza aurrera eramanez.

  • Futura – Kimikako titulu-espediente onena. Lourdes Patricia Sanmiguelek jaso du kimikako graduko edo zientzia eta teknologia kimikoekin lotutako beste graduren bateko espediente akademiko onenaren saria (titulua 2023an lortua). Horrekin batera, 2.000 euro eta SusChem-Españako eta ANQUEko urtebeteko afiliazioa eman zaizkio.
  • Investiga – Doktore batek egindako argitalpen zientifiko onena. Jordi Solerri (Kimikan doktorea Gironako Unibertsitatean) eta Jon Ander Onrubiari (Ingeniaritza Kimikoan doktorea Euskal Herriko Unibertsitatean) eman zaie 2023ko argitalpen zientifiko onenaren egilearen saria; argitalpenak kimikaren edozein arlotakoa izan behar zuen eta egileak 2023ko abenduaren 31rako jasoa izan behar zuen doktore-titulua. Horrekin batera, 3.000 euro eta SusChem-Españako eta ANQUEko urtebeteko afiliazioa eman zaizkie.
  • Innova – Sektore publikoaren eta pribatuaren arteko lankidetzako lan onena. Ester López Fernándezek jaso du sektore publikoaren eta pribatuaren arteko lankidetzan oinarrituta egindako lan onenaren saria. Horrekin batera, 5.000 euro eta SusChem-Españako eta ANQUEko urtebeteko afiliazioa eman zaizkio. Eta, horretaz gain, ekintzailetza teknologikoaren arloan dituen gaitasunak hobetzeko, aukera izango du egonaldi bat egiteko TECNALIAren kimika aplikatuko ikerketa-laborategietan edo TECNALIA Ventureseko taldearen mentoretza jasotzeko.

TECNALIA Ventures, adituen epaimahaian

Jesús Torrecilla, TECNALIAko Trantsizio Energetiko, Klimatiko eta Urbanoko Ventureseko zuzendaria, adituen epaimahaiko kide izan da aurten, eta, harekin batera, Cristina González (FEIQUE eta SusChem-España), Francisco García Labiano (CSIC), Belén Télamos (CEDQ), Gabriel González (OEPM), Carmen Cartagena (ANQUE) eta Beatriz Fernández (Expoquimia).