Bizitegi-eraikuntzan saldu osteko zerbitzua kudeatzeko sistema adimenduna

TECNALIAk sistema adimendun bat garatu du bizitegi-eraikuntzan saldu osteko zerbitzuaren kudeaketa optimizatzeko

Soluzio berritzaile horretarako, elkarlanean aritu dira Construcciones Olabarri eta Ukabi enpresa, software-garatzailea. Bezeroari zuzendutako elkarlaneko plataforma baten bidez jarriko da martxan, eta dagoeneko erabili da Gipuzkoako herri batean eraikitako eraikin baten saldu osteko kudeaketarako.

2024ko iraila. Eraikitzaileak eta sustatzaileak behartuta daude azken erabiltzaileari saldu osteko zerbitzu bat ematera, erreklamazioak kudeatzeko eta entregatu ondoren eraikinetan detektatutako akatsak konpontzeko, betiere Eraikuntzaren Antolamenduari buruzko Legeari jarraituz eta berme-epearen barruan. Erreklamazio horiek kudeatzeak, askotan, kostu handia eragiten dio enpresari, bai egin behar diren konponketengatik, bai kudeaketak berak behar duen denboragatik.

Bestalde, bezeroari kezka handia sor diezaioke erreklamazio-prozesuak, baldin eta sentitzen badu, etxebizitza erosteko inbertsio handia egin eta ilusio handia jarri ondoren, bere intzidentzia ez dela modu eraginkorrean tratatzen ari. Saldu osteko zerbitzuaren kalitateak eragiten du gehien bezeroaren gogobetetzean.

• TECNALIA berrikuntza eta garapen teknologikoko zentroak, Construcciones Olabarriren eta Ukabi enpresa software-garatzailearen lankidetzarekin, bizitegi-eraikuntzan saldu osteko kudeaketa optimizatzeko sistema adimendun bat garatu dute.
• Construcciones Olabarrik bermealdian izandako intzidentzien kudeaketan duen ezagutza baliatu dute proiektuan, eta plataforma baliozkotzeko esperientzia pilotu bat egin du eraikitzaileak. Izan ere, sistema dagoeneko erabiltzen ari da etxebizitzen sustapen batean (Orion, Gipuzkoan), eta horren emaitzak estrapolatu ahal izango dituzte beste sustapen batzuetara, bai eta bezero publiko eta pribatuentzat eraikiko dituzten etxebizitzetara ere.

Intzidentziak kudeatzeko SINTOP plataformak, batetik, aukera ematen du saldu osteko fasean intzidentziak denbora errealean erregistratzeko, eta, bestetik, informazioa egituratzen du modu adimentsuan aztertzeko eta kudeatzeko, bezero-arreta hobetzeko eta optimizatzeko. Gainera, plataformak erabat murrizten ditu arreta- eta asistentzia-denborak.

Plataformaren onurak

Plataformak enpresen prozesuak bi ardatzetan hobetzen ditu.

• Lehenik eta behin, intzidentzien sarrera zentralizatzen du, eta deiak, SMSak, WhatsAppeko mezuak eta mezu elektronikoak bereiz kudeatzeko beharra desagerrarazten du.  Intzidentziak erregistratzeko komunikazio-bide bakar gisa plataforma erabiliz, bermatzen da erregistroak behar dituen gutxieneko datuak eskuragai egongo direla, informazioa falta duten egoera gutxiago gerta dadin, eta, aldi berean, azken erabiltzaileak edo jabeak erraz erregistra ditzake intzidentziak eta prozesuaren jarraipena egin.
• Bigarrenik, SINTOP plataformak intzidentzien ebaluazioa optimizatzen du, eta aurrez aurreko bisiten beharra minimizatzen; izan ere, plataforman kargatutako datuak erabiltzen ditu, hala nola irudiak eta planoko kokapen-datuak. Horrek ahalbidetzen du intzidentziak in situ ikuskatu gabe ebaluatzea. Teknikari batek aztertu ondoren, baztertutako intzidentziak alde batera uzten dira eta onartutakoek ebazpen-prozesuak aktibatzen dituzte. Hala, plataformak automatikoki esleitzen dio intzidentzia bakoitza hura konpontzeko arduradunari, eta bere zeregina jakinarazten dio. Era horretan, kudeaketa arina eta eraginkorra dela ziurtatzen da. Adierazleei dagokienez, Construcciones Olabarriko teknikariek zenbait metrika kontsultatu ditzakete, intzidentzia-maiztasunik handieneko elementuak eta kokapenak identifikatzeko.

Saldu osteko prozesua hobetzeak abantaila handiak ekartzen dizkie eraikuntza-sustatzaileei produktibitateari dagokionez, eta, gainera, azken erabiltzailearen gogobetetzea hobetzen du. Etxebizitza-jabeak sistema elikatzen esku hartzeak eta intzidentzien egoeraren jarraipena egiteko aukera izateak kudeaketaren gardentasun-pertzepzioa areagotzen dute eta bezeroaren konfiantza indartzen. Aldi berean, bezeroaren etxebizitzaren mantentze-lanen kudeaketari buruzko sentsibilizazioa handitzen dute.

• Bestalde, enpresak kudeatutako obretako intzidentziei buruzko informazioak, behar bezala antolatu eta aztertuz gero, ahalmen handia du portaera-ereduak ezartzeko (maiztasunak, intzidentziak dituzten elementuak, kalteen jatorria, patologien irismena). Horri esker, Construcciones Olabarrik badu aukera akatsetatik ikasi eta prebentzio-neurriak hartzeko, etorkizuneko obretan ahalik eta intzidentzia gutxien izateko, eraikinen kalitatea hobetzeko eta azken erabiltzaileei zerbitzu hobea eskaintzeko.

Intzidentziak kudeatzeko SINTOP web-plataformarekin lortutako emaitzak

Itxaropentsuak dira orain arte intzidentziak kudeatzeko SINTOP web-plataformarekin lortutako emaitzak. Horren ondorioz, Construcciones Olabarri animatzen ari da plataforma garatzen jarraitu eta beste obra-tipologia batera zabaltzeko.

• Intzidentziei erantzuteko denboretan aurrezten da.
• Eraikina saldu osteko zerbitzuaren kalitatea hobetzen da.
• Gremioek emandako zerbitzuen kalitatea hobetzen da.
• Bezeroaren gogobetetzea hobetzen da.