UPV/EHUk eta TECNALIAk lankidetza zabaldu dute, ikerketa eta transferentzia hobetzeko

Universidad del País Vasco/Euskal Herriko Unibertsitateak (UPV/EHU) eta TECNALIA ikerketako eta garapen teknologikoko zentroak lankidetzarako esparru hitzarmen berria sinatu dute

Universidad del País Vasco/Euskal Herriko Unibertsitateak (UPV/EHU) eta TECNALIA ikerketako eta garapen teknologikoko zentroak lankidetzarako esparru hitzarmen berria sinatu dute, bi erakundeen artean harremanak sendotzeko eta dagoeneko prestakuntzan, ikerketan, transferentzian, berrikuntzan eta ezagutzaren zabalkundean dauden lankidetza jarduerak areagotzeko. Hitzarmena gaur sinatu dute Nekane Balluerka UPV/EHUko errektoreak eta Iñaki San Sebastián TECNALIAko CEOak.

Akordioak, besteak beste, hezkuntza eremuan, TECNALIA ikasgelak, UPV/EHUn gradu amaierako lanak, master amaierako lanak eta TECNALIAko langileen zuzendaritza ere baduten doktoregoko tesiak egiteko UPV/EHUn dauden espazioak erabiltzea aurreikusten du. Halaber, TECNALIAren bulegoetan hezkuntza praktikak egitea ere jaso du, UPV/EHUko ikasleentzat, proiektuak edo bestelako I+G+b jarduerak egiteko. Gainera, zentro teknologikoko langileek irakaskuntzan lankidetzan jardutea aurreikusten du, bai eta graduondoko ikasleek prestakuntza jarduerak garatzea ere.

Ikerketako, transferentziako eta berrikuntzako eremuak direla eta, sinatutako hitzarmenak Joint Research Laboratory-ren (Baterako Ikerketa Laborategiak) inguruan antolatutako talde mistoak sortzea sustatzen du. Era berean, xede du UPV/EHUko eta TECNALIAko ikertzaile taldeen arteko lankidetza sendotzea eta, horretarako, EUSKAMPUS Joint Research Unit (JRU) aitortu eta eratzea; egitura hori Europar Batasuneko ikerketa programetan aitortuta dago, eta kideei aukera ematen die erakunde bakar gisa jarduteko.

Esparru hitzarmen horren bidez, baterako ikerketa taldeen arteko hitzarmen bereziak garatzea sustatuko da, gai zehatzen inguruan, eta, horretarako, bi erakundeen arteko langile tekniko eta ikertzaileen trukea sustatuko da. Gainera, akordioak ezartzen du zein den kultura ekintzailea sustatzeko programak egiteko esparrua eta, zabalkundearen eremuan, batera jardunaldi, mintegi eta biltzarrak antolatzeko aukera.

Nekane Balluerka UPV/EHUko errektoreak zorionak eman ditu hitzarmen honengatik. “Euskal Herriko Unibertsitatearentzat, gizarteari, enpresen edo gizarte erakundeen bidez, ezagutza transferitzea funtsezko helburua da, baina gaur sinatu dugun esparru hitzarmenak beste lan alderdi batzuk ere hartzen ditu: lankidetza irakaskuntza eremuan (praktikak, gradu amaierako lanak, master amaierako lanak…) eta ikerketa eremuan (doktorego tesiak edo lankidetzako talde mistoak sortzea). Urte hauetan izan den harreman estuaren ondorioz, hitzarmen honek atea irekitzen du aukera berriak edukitzeko, eta TECNALIA, Europako zentro teknologiko garrantzitsuenetako bat, gure unibertsitatearentzako aliatu estrategiko gisa egiaztatzen du”.

Iñaki San Sebastián TECNALIAko CEOak, bestalde, oso positibotzat jo du akordio hau; izan ere, “akordio hau estrategikoa da, eta aukera ematen digu inguruneko garapen ekonomikoari, sozialari eta kulturalari bide emango dioten ezagutzako –hezkuntza, ikerketa eta berrikuntza– ekosistemak, nazioarteko proiekzioa dutenak, sortzen aurrera egiteko. Aukera emango du inpaktu eta iraunkortasun gehieneko I+G+b jarduerako balio kateak sortzeko, posizionamendu osagarrietatik, eta, horrela, UPV/EHUren eta TECNALIAren arteko sinergiak sendotzeko”.

TECNALIAri buruz

TECNALIA Ikerketako eta Garapen Teknologikoko Zentroa da, Europan erreferentea; 30 nazionalitatetako 1.400 aditu ditu; teknologia pertsonen bizi kalitatea hobetzeko BPGd bilakatzera bideratuta dago eta, horretarako, negozio aukerak sortzen ditu enpresetan.

www.tecnalia.com

UPV/EHUri buruz

UPV/EHU Shanghaiko rankinean munduko 500 unibertsitate onenen artean dagoen Euskadiko unibertsitate publiko bakarra da. Graduko eta graduondoko 43.000 ikasle baino gehiago ditu, eta, plantillan, 7.500 pertsona ditu, goi mailako hezkuntzan, ikerketan eta transferentzian zerbitzu emateko. Euskadiko ikerketa eragile nagusia da.

www.ehu.eus