El Salvadorren berrikuntza-zentro bat sortzen lagundu dugu

Urtarrilean, hiru astez, TECNALIAko Estrategia eta Negozio Adimena eta IKT arloek osatutako talde batek enpresa-topaketak egin ditu El Salvadorren.

Ekimen hori El Salvadorreko Gobernuko Ekonomia Ministerioko Berrikuntza eta Kalitate Zuzendaritzak bultzatu du, eta aztertzen du ea teknikoki eta ekonomikoki bideragarria den enpresen berrikuntza eta garapen teknologikorako zentro bat (CIDTE) garatzea, diseinuan espezializatua.

El Salvadorreko gobernuaren helburua da enpresen berrikuntza eta garapen teknologikorako zentro bat sortzea, erreferente izango dena eta informazioaren eta komunikazioaren teknologien sektoreko agente eraldatzaile izango dena. Haren eginkizuna, nagusiki, sektorearen gaitasunak indartzea, berrikuntza bultzatzea eta profesionalen talentua garatzea izango da, eta sortzen ari diren teknologia hauek erabiliko ditu: gauzen Internet, errealitate birtuala, errealitate areagotua, adimen artifiziala, big data, cloud eta zibersegurtasuna.

Lehen fase honetan, azterketa-arloen artean izan dira eraldaketa digitala, IKTetako joerak eta zentro teknologikoek IKTen sektoreko berrikuntza-ekosistemaren bultzatzaile eta katalizatzaile gisa duten garrantzia.

Aztertutako gaietako bat izan da herrialde mailan IKTen sektorearen gaitasunak indartzeko politikak eta programak zabaldu beharra, sektoreak berez duen garrantziagatik eta beste sektore finalista batzuetan sortzen duen eraginagatik; bereziki, industria sortzaileetan.

IKTen sektorera zuzendutako ikerketa-egituretan inbertitzeak esan nahi du ezagutza barne-produktu gordin bihurtzea, eta, beraz, gaitasunak sortzea El Salvadorreko industria bere osotasunean eraginkorragoa, produktiboagoa eta digitalagoa izan dadin.