"H2SITEk presio altuetan funtzionatzen duten antzeko unitateak eraiki ditu, eta eskala handiko proiektuak garatzen ari da Europan”
H2SITEk, TECNALIAren partaidetzapeko enpresak, mintz-bereizgailu bat jarri du martxan, % 5-20ko kontzentrazioko hidrogeno nahasteetatik % 99tik gorako purutasuneko hidrogeno-nahasteak erauzten dituena.
Aurrerapen horiek gas naturala banatzeko Zamudion (Bizkaia) dagoen sare bateko bereizte-unitate batean lortu dira. % 5 eta % 20 arteko hidrogeno-kontzentrazioekin egiten du lan. Paladio-aleaziozko mintz-bereizgailuak erabiltzen dituen lehen instalazioa izateaz gain, hidrogenoaren % 97 berreskuratzea lortzen du, % 99tik gorako purutasunarekin.
Era berean, H2SITEk presio altuetan funtzionatzen duten antzeko unitateak eraiki ditu, eta eskala handiko proiektuak garatzen ari da Europan.
H2SAREA, H2SITEren proiektu bat
H2SITEren H2SAREA proiektuaren bidez, frogatu da bateragarriak direla hidrogenoaren eta gas natural berriztagarriaren nahasteen garraioa eta banaketa-azpiegiturak. Hala, mintz-bereizgailuen teknologiari esker, bi erregai puruak erabil daitezke bakoitzari etekinik onena ateratzen dieten sektoreetan.
“Jatorrizko gas-fluxutik hidrogenoaren % 97 baino gehiago bereiztea lortu dugu, oso purutasun handiarekin, eta, aldi berean, bermatu dugu hornitzen dugun gas naturalak egungo erabiltzaileen zehaztapenak betetzen dituela", adierazi du Andrés Galnares H2SITEko CEOak.
Proiektu honekin, H2SITEk lortu du frogatzea % 5 eta % 20 arteko hidrogeno-kontzentrazioko nahasteetatik hidrogenoa bereiztea bideragarria dela, eskualdeko Nortegas banaketa-sistemaren operadorearen (OSD) gas-sarean.
Gainera, konprometitzen da energia-matrize garbiago eta jasangarriago baterako trantsizioan ekarpen esanguratsua egitera. Izan ere, gas naturaleko sarearen barruan hidrogenoan oinarritutako soluzio aurreratuak ezartzeko ikuspegian bat dator Nortegasekin. H2SAREAren teknologia baliozkotu izanak aurrerapen handiak ekarri ditu hidrogenoa kostu txikian garraiatzeko soluzioentzat.
H2SITEri buruz
H2SITE 2020an sortu zen, TECNALIA ikerketa aplikatuko eta garapen teknologikoko zentroak haren Deep Tech Venture Builderra den TECNALIA Venturesen bidez Frantziako ENGIE New Ventures enpresarekin eta Eindhovengo Teknologia Unibertsitatearekin (TUe) izandako lankidetzaren ondorioz.
Erreaktore eta bereizgailuetarako teknologia esklusiboa du, zeinaren bidez zenbait lehengai (hala nola amoniakoa, metanola eta gas sintetikoa) hidrogeno bihurtzen baitira eta gatz-haitzuloetako edo hidrogeno geologikoko kontzentrazio baxuko gas-nahasteetatik hidrogenoa bereizten baita.
