"IE Business School eta TECNALIAk, bere deep tech Venture Builder den TECNALIA Venturesekin batera, sortzen ari diren enpresa horiei hazten laguntzeko behar dituzten baliabideak, aholkularitza eta harreman-sare teknologikorako sarbidea emango dizkiete"
IE Business Schoolek eta TECNALIA Venturesek (TECNALIAren deep tech Venture Builderra) akordio bat sinatu dute deep tech enpresetan berrikuntza eta talentua sustatzeko.
IE Business School ek (nazioartean aintzatetsitako negozio-eskola) eta TECNALIAk (Europako ikerketa aplikatuko eta garapen teknologikoko zentro handienetako bat) akordio estrategiko bat sinatu dute enpresa disruptiboen garapena eta eskalatzea bizkortzeko. Helburua da ikasleei eta graduatuei karrera garatzeko aukerak ematea, ikerketa-proiektuak bultzatzea eta mundu akademikoaren eta enpresaren arteko eztabaida eta komunikazioa sustatzen duten ekitaldiak antolatzea.
Asier Rufino TECNALIA Ventureseko zuzendariaren hitzetan: «Balio-kate berriak sortzeko potentzialaren eraginez, deep tech sektorearekiko interesa pizten ari zaie arduradun politikoei, eskualdeko berrindustrializazioa eta subiranotasun teknologikoa bultzatzeko gaitasuna duelako, eta alderdi horiek funtsezkoak direlako Europako Berrikuntza Agendan. Ekimen horren bidez emaitza onak lortzeko, beharrezkoa da ikuspegi zientifikotik eta aldi berean enpresa-ikuspegitik ondo prestatuta dauden taldeak sortzen dituzten ekosistemak garatzea. Horixe da aliantzaren helburua».
Deep tech sektoreko pertsona berritzaileak eta liderrak sortzea
Jesús Valerok, TECNALIAko zuzendariak, akordioa sinatu zuen joan den astean: deep tech sektoreko pertsona berritzaile eta liderren hurrengo belaunaldiari prestakuntza ematea da helburu nagusietako bat.
- IE Business Schooleko ikasleek aukera izango dute TECNALIAren partaidetzapeko enpresetan praktikak egiteko eta ikerketa-proiektuetan parte hartzeko.
- Lanek arlo hauek izango dituzte ardatz: fabrikazio adimenduna, osasuna eta elikadura, eraldaketa digitala, hiri-ekosistema, trantsizio energetikoa, ekonomia zirkularra eta mugikortasun jasangarria.
- Eta praktikek zein proiektuek aukera emango diete beren ezagutza erabil dezaten erronka teknologikoetarako soluzioak bilatzen.
- Halaber, graduatuek aukerak garatu ahal izango dituzte TECNALIAk partaidetutako deep tech enpresetan.
Horretaz gain, IE Business School eta TECNALIAk baterako ekitaldiak, lantegiak, mintegiak eta hitzaldiak antolatuko dituzte, ezagutza-trukea, harreman-sareen garapena, karrera garatzeko aukerak eta sektore teknologikoko zuzendarien, ekintzaileen, ikertzaileen, graduatuen eta ikasleen arteko lankidetza sustatzeko.
