“Lehiakorrak izateko, industria automatizatu eta malgua behar dugu, hutsegiterik, matxurarik eta geldialdirik gabe ekoizteko aukera izan dezagun”
Biki digitalen egitekoa oso antzekoa da alor ekonomikoa dena dela: simulatzen duten erreplika errealaren egoera kontrolatzen dute; portaerak iragartzen dituzte; etorkizun hurbilean gerta litezkeen hutsegite edo akatsei aurrea hartzen diete; ezustekoak jarduera eten gabe zuzentzen dituzte; funtzio berriak edo egoera berriak probatzen dituzte mundu birtualean, fisikoan arriskurik hartu gabe; eta aldaketak probatzen dituzte, ingurune errealean txertatu aurretik.
Diego Galar Fidagarritasun eta Mantentzeen zientzia-arduradunak hau esan du ABC egunkariak 4.0 industriari buruz egindako elkarrizketa batean "IIoT edo gauzen Internet industrialari esker, datuak bildu eta oso kostu baxuan bluetooth eta wifi bidez transmititzen dituzten tenperatura-sentsore, bibrazio-sentsore, ultrasoinu, laser-kamera eta abar merkeago daude. 5G-arekin, kostu txikiagoko sentsore gehiago izango dira, eta datu gehiago. Eta hodeiko konputazioak aukera eman digu datu-kantitate izugarria azkar igotzeko eta bizkor prozesatzen duten ereduak izateko. Kristalezko bola bat izatea bezalakoa da".
Benetako iraultza iristeko dago oraindik, eta iritsiko da “biki digitalek gizakiaren esku-hartzerik gabe elkarri eragiten dietenean, makinek beren sare sozialak sortzen dituztenean eta beren artean datu eta gertaera garrantzitsuak argitaratzeko gai direnean. 4.000 roboteko enpresa batean, robotek elkarlanean ikas dezakete. Eta beren erabakiak hartuko dituzte".
Industriak probetxua atera diezaioke biki digitalen teknologiari. "Lehiakorrak izateko, industria automatizatu eta malgua behar dugu, hutsegiterik, matxurarik eta geldialdirik gabe ekoizteko aukera izan dezagun. Industriak ekoizpen laburrak egitera pasatu behar du, garaietara eta errealitatera egokitu. Orain dela 12 urteko auto-modeloak dagoeneko ez daude merkatuan. Orain, bizpahiru urte irauten dute”, adierazi du Galarrek. Biki digitalak erabiltzeak asko lagunduko luke malgutasun hori izaten.
Informazio gehiago
Biki digitalei buruz eta ingurune industrialetako eragiketetan eta mantentze-lanetan duten erabilerari buruz gehiago jakin nahi baduzu, ikusi Diego Galarrek emandako webinar hau, non biki digitalen gakoak erakusten baitizkigu.
