TDG

TDG 100 urte baino gehiagoko enpresa bat da, eta doitasun handiko eskuzko tornu eta tornu automatikoen platerak diseinatzen eta fabrikatzen ditu. Orain, merkatuak harago joatea eta digitalizaziora jauzi egitea eskatzen die, mekanizazio-prozesuak optimizatzeko eta soluzio berriak eskaintzeko.

TDGk, beste batzuen moduan, etengabe garatu behar ditu negozioak, lan-prozesuak eta teknologiak. Egun, digitalizazioa ezinbesteko tresna da lehiakorrak izateko eta abangoardian kokatzeko.

TDGk eusteko soluzioetan duen esperientzia eta TECNALIAko diziplina anitzeko taldea batuta, zerbait erabat berritzailea eta iraultzailea aurkitu dugu: SmartChuck.

“TDG SmartChuck haririk gabeko sentsoreak dituen euste-soluzio bat da, mekanizazioetarako, eta horrek aukera ematen du euste-indarra modu dinamikoan monitorizatzeko eta informazioa denbora errealean emateko”, azaldu du Fernando Santamaría TDGko Merkataritzako eta Marketineko zuzendariak.

“Soluzio hori elkarlanaren emaitza da, Smart osagaiaren sortze teorikotik hasi eta elektronikaren garapen eta inplementazioraino, betiere mundu errealeko erabilera ahaztu gabe”, adierazi du Jaime Latapia TECNALIAko Smart Monitoringeko arduradunak.

Lankidetza horri esker, ezagutza eta esplorazio-eremu berri bat lortu da, orain arte ez baitzegoen modurik torneaketa-prozesuan benetako euste-indarra eta beste datu asko zehaztasunez neurtzeko.

Euste-soluzio seguruago bat eskaintzeaz gain, produktu-zorroa zabaldu dute, eta bezeroei funtzionalitate berriak eskaintzeko aukera dugu, gure ohiko soluzioen barruan. Hala, inpaktua bikoitza eragin da:

• Alde batetik, 4.0 negozio-lerro berri bat garatzeko aukera dago, eskuratutako ezagutza berri bati esker. Ezagutza hori askoz gehiago ustia daiteke prozesuak hobetzeko eta optimizatzeko.
• Bestetik, bezeroei laneko segurtasun handiagoa bermatzen zaie, estutze-momentu optimoa ziurtatuz, eta pieza gutxiago baztertzen dira, baita sektore eta pieza handi eta konplexuenetan ere.