“Berrikuntzak bultzatzen ditugu monopilotearen beraren, trantsizio-piezaren eta bien arteko lotura-sistemaren diseinuan eta fabrikazioan”
MEGAWIND proiektuak monopiloteak hobetuko ditu —merkatu eolikoan potentzial handiena duen zimendatze-mota—, eta itsas aerosorgailu handien belaunaldi berriarekin integratuko ditu (+15 MW)
WindEuroperen azken txostenak dioenez, Parisko Akordioan planteatutako deskarbonizazio-helburuak lortzeko, Europan bakarrik eta hamarkada honetan, itsas energia eolikoan 2021. urtearen amaieran instalatuta dagoen 28 GW-eko potentzia 135 GW-era igaroko da 2030ean. Horrek esan nahi du hirukoiztu egingo dela egungo urteko instalazio-erritmoa.
Offshore parkeetan erabiliko diren aerosorgailuek gero eta potentzia handiagoa dute, eta zenbait motatako zimenduen gainean instalatzen dira. Monopiloteak erabiltzen dira gehien, kasuen % 80an baino gehiagoan. MEGAWIND ekimenaren helburu nagusia da berrikuntzak bultzatzea monopilotearen beraren, trantsizio-piezaren eta bien arteko lotura-sistemaren diseinuan eta fabrikazioan.
Itsas energia eolikoan erreferentzia diren bederatzi euskal enpresak osatutako partzuergoa
Proiektua 2022an hasi zen itsas sektore eolikoan erreferentzia diren bederatzi euskal enpresak osatutako partzuergo batekin, ERREKAk koordinatuta. TECNALIA partzuergo horretako kide da, eta laguntza emango die bazkide guztiei lan-ildo, jarduera eta ikerketa-lerro guztietan parte hartuz.
Aerosorgailuen potentzia eta tamaina handitzea erronka handia da monopiloteak fabrikatzeari dagokionez. Ohiko soldadura-metodoak baliatu beharra da fabrikazio-prozesuaren botila-lepoetako bat, altzairuzko xafla handiak hornitzea eta lotzea eskatzen baitu. HAIZEA WINDek eta IBERDROLAk hutseko elektroi-sorta bidezko soldadura-metodo bat egokitzeari eta baliozkotzeari ekingo diote. Metodo hori ez da inoiz aplikatu orain arte horrelako loturetan, eta haren bideragarritasunak nabarmen handituko luke ekoizpen-erritmoa.
Monopiloteen tamaina handitzearekin lotuta dago trantsizio-piezak eta lotura-bridak handitzea ere. NAVACELek sektoreetan brida handiak diseinatzen lan egingo du, eta horrek beste hornitzaile bat ipiniko du eskari handiko merkatu horretan.
Erronka dira, era berean, ERREKAk etorkizuneko monopiloteentzat garatuko dituen torloju bidezko loturak. Enpresak bi bide ikertuko ditu proiektuan: alde batetik, hari metriko handiko torlojuak instalatzea eta estutzea errazteko tresnak eta prozedurak garatzea, eta, bestetik, berrikuntzak egitea torlojuetan, hala nola material-konbinazioan, propietate mekaniko berberak lortu ahal izateko torlojuen hari metrikoen tamaina murriztuta. Era berean, ERREKAk sentsorika birtuala garatuko du monopilotearen, trantsizio-piezaren eta dorrearen osasun-egoera estrukturala ezaugarritu ahal izateko.
GALVASALA, TTT GROUP eta FEX hiru lan-ildotan arituko dira, osagaien iraupenaren erronkari aurre egiteko offshorearen ingurune zailean: pieza galvanizatuetarako estaldurak, tratamendu termikoak eta laser-deposizioaren bidez korrosioaren aurka babestea.
MEGAWIND: informazio gehiago
MEGAWINDek eragin positiboa izango du proiektuko bazkideen inguruko hornidura-katean; esate baterako, Bilboko portuko jarduera areagotuko du, izango du inpakturik osagaiak fabrikatzeko lehengaien hornitzaileetan, edo are osagai berriei estaldurak aplikatzeari dagokionez.
Ekimen honek hiru urteko iraupena izango du, Eusko Jaurlaritzaren Hazitek Programak lagunduta.
Eusko Jaurlaritzako Ekonomiaren Garapen, Jasangarritasun eta Ingurumen Sailak finantzaturiko proiektua (HAZITEK Programa).
