“Aztertuko dugu ea bideragarria den Smart city kontzeptuaren inguruko eskaera teknologikoei benetako testuinguru batean erantzutea”
Hitzarmena aste honetan sinatu dute Building Technologieseko zuzendari Javier Urreta ermuarrak eta Ermuko alkate Juan Carlos Abascalek
Ermuko Udalarekin lankidetza-hitzarmen bat sinatu dugu proiektu pilotu bat garatzeko eta esperimentazio-ingurune bat sortzeko, hartara enpresentzat (Izarra Centreko IoT Laborategikoentzat zein beste batzuentzat) baliagarria izan dadin soluzio teknologikoen aplikazioak simulatzeko eta testatzeko, benetan hedatu eta merkaturatu aurretik.
Digital Innovation Hub kontzeptuaren proba honen helburua ez da azken produktu bat, baizik eta berrestea bideragarria dela soluzio teknologikoki aurreratuekin lotutako I+G+B arloko jardueretarako azpiegitura bat edukitzea; batez ere smart city-ari aplikatutako informazioaren eta komunikazioaren teknologiei (IKT) eta IoT (Gauzen Internet) teknologiei lotutakoak.
Ermuko Udalaren plangintza estrategikoa eta hiri-plangintza
Ermuko udalerriak udalaren plangintza estrategikoko eta hiri-plangintzako tresnen ildoko aplikazio-esparruak eskainiko dizkio proiektu pilotuari; tresna horietako batzuk dira Hiri Agenda berria, Irisgarritasun Plana eta erreferentziako beste plan batzuk. Halaber, hiri-aktiboei eta aktibo soziodemografiko eta ekonomikoei buruzko datuak eskuratzea erraztuko du.
Era berean, proiektu pilotuak izan ditzakeen erabilpenak identifikatuko ditu analisi prediktiboaren bidez, udalaren azpiegiturak eta aktiboak planifikatzeko, mantentzeko eta erabiltzeko. Horrekin guztiarekin, esperimentazio-ingurune birtual bat izan nahi da, ingurune errealetara pasatu aurretik.
Lankidetza-hitzarmena da; horrenbestez, ez da aurreikusten bi alderdien arteko ordainsaririk, eta bakoitzak bere gain hartuko ditu hitzartutako jardueren kostuak. Proiektuak jarraipen-batzorde bat izango du, gutxienez hiruhilekoan behin bilduko dena.
