“Estatu mailako esperimentazio-ingurune berdingabea eskaintzen dugu mugikortasunarekin eta azpiegiturekin lotutako teknologia-mota guztietarako”
Bizkaia Connected Corridor erreferentziazko proiektua da ibilgailu autonomoen eta garraio-sistema adimendunen arteko konektagarritasunean
TECNALIAk asmo handiko apustua egin du etorkizuneko mugikortasunean, abangoardiako teknologietan oinarrituta, hala nola gidatze autonomoan, trafiko-kudeaketa adimendunean eta mugikortasun jasangarriko soluzioetan. Eraginkortasunaren eta jasangarritasunaren ikuspegitik, TECNALIAk garraio-esperientzia seguruagoa, erosoagoa eta ingurumenarekiko adeitsuagoa eskaintzen du. Gainera, trafiko-pilaketen eta ingurumen-kutsaduraren egungo erronkei aurre egin nahi die, etorkizun guztiontzat konektatuago eta garbiago baterako bidea eginez.
Ingeniaritza adimen artifizialeraino eta energia berriztagarriraino
Gure zentroan zenbait arlotako adituak ditugu, ingeniaritzatik hasi eta adimen artifizialeraino eta energia berriztagarriraino, gure hirietan mugitzen garen modua goitik behera aldatuko duten soluzio osoak garatzeko. Mugikortasun adimendun berriak, gure bizi-kalitatea hobetzeaz gain, nabarmen lagunduko du klima-aldaketaren aurka egiten.
Bizkaia Connected Corridor (BCC)
Azpiegitura seguru eta konektatuen teknologiak probatu eta baliozkotzeko Bizkaia Connected Corridor (BCC) – living lab sentsorizatuaren bidez, esperimentazio-ingurune berdingabea eskaintzen dugu Estatuan, mugikortasunarekin eta azpiegiturekin zerikusia duten mota guztietako teknologietarako.
Bizkaiko Foru Aldundiaren eta TECNALIAren proiektu estrategiko bat da BBC, korridore kooperatibo bat sortzeko: 57 km autobide, digitalizatuta eta sentsorizatuta, enpresek mugikortasun autonomoko, konektatuko eta kooperatiboko teknologia aitzindariak eta azpiegitura adimendunak probatzeko. Puntako teknologiekin lotutako garapen teknologikoak ditu, hala nola Cooperative-ITS, Internet of Things, mugikortasun autonomoa, biki digitala, eta ekonomia zirkularra eta jasangarritasuna, besteak beste.
BCC, hala, proiektu enblematikoa da Bizkaian, eta ibilgailu autonomoen eta garraio-sistema adimendunen arteko konektagarritasuneko erreferente bihurtu da. TECNALIAk International Conference on Intelligent Transportation Systems (ITSC) delakoan parte hartzeak aukera paregabea eskaintzen du TECNALIAren azken aurrerapen teknologikoak aurkezteko eta mugikortasun adimendunaren arloko funtsezko eragileekin lankidetza estrategikoak ezartzeko.
