"Adimen artifizialak lantokietako lan-baldintzak eta ongizate orokorra hobetzen ditu”
Gizakien eta roboten arteko lankidetza nabarmen aberasteko lanean ari gara
Beste 12 bazkiderekin batera, industria-inguruneetan gizakien eta roboten arteko harremanari AAn oinarritutako soluzio berriak eskaintzeko lanean ari gara. Lan-ekosistema bat sortu nahi dugu, zeinean gizakien eta roboten arteko komunikazioa eta lankidetza ahal bezain naturala eta erraza izango baita. Hori lortzeko, irtenbide holistikoak garatu nahi ditugu, alderdi bisualak, keinuzkoak eta ahotsezkoak kontuan hartzen dituzten komunikazio multimodalak aprobetxatzen dituztenak. Horri esker, robotek gizakiei modu gizatiarrago eta enpatikoago batean ulertu eta erantzun ahal izango diete.
Proiektu hau oso hedadura zabalekoa da, eta hainbat sektoretan du potentziala, hala nola eraikuntzan, azpiegitura-zerbitzuetan eta ingurune industrialetan.
- Proiektuak, FORTIS izenekoak, eraikuntzaren sektorean segurtasuna eta efizientzia hobetu nahi ditu, horretarako proiektuen plangintza eta egikaritzea optimizatuz.
- Bestalde, azpiegitura-zerbitzuetan azpiegitura kritikoak mantentzen eta ikuskatzen lagundu dezake, eta, ondorioz, segurtasuna eta efizientzia areagotzen.
- Manufaktura-industriaren esparruan, FORTISek ekoizpena optimizatzen du. Horretarako, langileen eta roboten arteko lankidetza efizienteagoa sustatzen du, eta horren emaitza produktibitate eta segurtasun handiagoa dira.
Industria-inguruneak
Interakzio errazagoa eta naturalagoa ahalbidetzen denez, efizientzia eta produktibitatea areagotzen laguntzen dugu zeregin kolaboratiboen aukera zabal batean. Teknologia langileen beharretara egokituz, ez dira langileak teknologiara egokitzera behartzen; aitzitik, laneko ongizatea eta gogobetetasuna hobetzen dira.
Gainera, gizakion ingurunea eta asmoak hobeto hautematen eta ulertzen direnez, arriskuak minimizatzen ditugu eta pertsona guztientzako lan-ingurune babestua sustatzen dugu. Horrela, lantoki askoz ere seguruagoak sortzen laguntzen dugu.
Gizakien eta roboten arteko komunikazio eta lankidetza natural eta errazeko lan-ekosistema bat diseinatzeko, beharrezkoa da alderdi hauek konbinatzea: teknologia aurreratua, erabiltzailearengan ardaztutako diseinua eta giza dinamikaren eta talde-dinamiken ulermen sakona.
Alderdi horretatik, adimen artifizialak (AA) ahalmen itzela du lantokietako lan-baldintzak eta ongizate orokorra hobetzeko. AAk istripuak automatikoki iragarri eta prebenitu ditzake, eta arriskuak denbora errealean minimizatu. Horri esker, langileentzako ingurune askoz seguruagoa sortzeko gai da AA.
