"Gailu berri bat sortzen ari gara hormigoizko portu-egituren itsas korrosioa hobeto ulertzeko eta neurtzeko"
Teknologia aurreratuak garatzen ditugu Europako portuen erresilientzia, jasangarritasuna eta segurtasuna hobetzeko, ingurumenarekin loturiko erronkei aurre egiteko.
TECNALIA muturreko gertaeretan portu-azpiegituren erabilgarritasun operatiboa handitzeko soluzio berritzaileak garatzen ari da, Rotterdameko, Hanburgoko, Anberes-Brujaseko eta Konstantzako portuekin batera.
CLARION ekimenean, emisio txikiko garraio-sistemetaranzko aldaketa modalak sustatzen ditugu, eta klimarekin lotutako perturbazioek eragindako istripuak murrizten ditugu. Hala, pilotuak egingo ditugu portuen erresilientzia eta jasangarritasuna hobetzeko teknologia eta estrategia aurreratuak probatu eta ezartzeko.
Horretaz gain, open innovation ekosistema bat sortuko dugu portuen arteko lankidetza nazioartean bultzatzeko, jasangarritasunaren eta klima-erresilientziaren arloan.
Itsas korrosioa neurtzea eta airearen kalitatea eta meteorologia aurreikustea
Ekimen horren barruan, gailu berri bat sortzen ari gara hormigoizko portu-egituren itsas korrosioa hobeto ulertzeko eta neurtzeko.
- Airearen kalitatea eta meteorologia aurreikusteko AAn oinarritutako sistema bat, portuetako biki digitalen barruan erabakiak hartzeko sistemak integratzeko, denbora errealean kontrolatzeko kostu txikiko monitorizazio-sareen bidez.
- Sentsore-datuen kalitaterako modulu bat, sentsoreen datuak denbora errealean ebaluatzeko eta kudeatzeko, fidagarritasuna ziurtatu eta biki digitalen eta erabakiak hartzeko sistemen errendimendua optimizatze aldera.
- Horretaz gain, biki digitalaren barruko datu-iturri heterogeneoen arteko elkarreragingarritasunerako ontologia bat.
Klima-aldaketara egokitzea
Gaur egun, klima-aldaketaren arrisku fisikoek gero eta gehiago erasaten diete portuko azpiegitura eta aktiboei. Etorkizuneko ikuspegia duen portu-plangintzaren helburuetako bat da portuen irisgarritasun seguruena eta fidagarriena bermatzea. Horregatik, testuinguru horretan oso garrantzitsua da ingurumen-baldintzetara egokitzeko gaitasuna izatea, hala nola klima-aldaketara edo muturreko baldintza meteorologikoetara.
