"Gertaera kaltegarrien ondoren sare elektrikoek azkar berreskuratzeko duten gaitasuna hobetzeko soluzio berritzaileak garatuko ditugu"
Elkarlanean ari gara Mondragon Goi Eskola Politeknikoarekin, EHUrekin, Ikerlanekin, ZIV I+Drekin eta Energia Klusterrarekin, sare elektrikoek gertaera kaltegarriekiko duten erresilientzia hobetzeko
Mehatxu natural gero eta handiagoen aurrean eta energia-iturri berriztagarrien integrazioak dakarren kalteberatasun gero eta handiagoaren aurrean sare elektrikoek duten erresilientzia hobetzeko erronkari heldu diogu. RESINET ekimenaren ikuspegi berritzaileak (zeinak buru baitu Mondragon Goi Eskola Politeknikoa) sare elektrikoen berreskuratze-ahalmena hobetzeko abangoardiako soluzio, teknologia eta tresnak ikertu eta garatzea du ardatz, gertaera kaltegarrien ondoren azkar leheneratu daitezen, energia elektrikoaren hornidura segurua eta fidagarria bermatzeko.
TECNALIA potentzia-bihurgailuek kontrolatutako etorkizuneko sistema elektrikoen egonkortasuna aztertzeko metodo matematiko aurreratuak garatzen zentratuko da. Halaber, sorkuntza berriztagarriaren integrazio maila handiko sistemetara egokitutako algoritmoak sortuko ditu babes-erreleetarako.
Sare elektrikoen mehatxuak
Sare elektrikoek hainbat mehatxuri aurre egin behar izaten diete: klima-faktoreak (hala nola ekaitzak, uholdeak eta haize gogorrak), linea elektrikoak bota baititzakete); muturreko gertaera naturalak (hala nola lurrikarak eta tsunamiak), kalteak eragin baititzakete azpiegitura kritikoetan…
Horietaz gain, badaude beste arrisku batzuk, giza ekintzek eragindakoak, hala nola erasoak eta operazio-akatsak, baita elektrizitate-eskariaren gailurrak (lineetan gainkargak sortu baititzakete) eta energia elektrikoa sortzeko erregaia falta izatea ere. Faktore horiek guztiek etenak eragiten dituzte hornidura elektrikoan.
Proiektuaren bazkideak
Partzuergoak Mondragon Goi Eskola Politeknikoa du buru, eta erakunde hauek, partaide: EHU, Ikerlan, TECNALIA, ZIV I+D eta Energia Klusterra. Halaber, Eusko Jaurlaritzaren babesa du, Elkartek programaren bidez.
