"Zirkulartasuna handituko da, aukera emango baitu azal-hondakinak beste aplikazio erabilgarri batzuetara bideratzeko; orain erre ohi dira energia sortzeko"
Zur bigunaren azalaren osagai naturalak aztertzen ari gara itsasgarri eta estaldura seguru, jasangarri eta errendimendu handikoak garatzeko
Pinu- eta izei-azaletik eratorritako itsasgarri eta estaldura seguru eta jasangarriak sortzen dihardugu lanean,baso-industriako azpiproduktu baliotsuak baitira. Erauzketa aurreratuko teknologia baliatuz, % 95etik gora eduki biooinarritua duten itsasgarri eta estaldurak garatu, probatu eta baliozkotuko dira, SuperBark ekimenaren barruan. Besteak beste altzarigintzan, eraikuntzan, garraioan eta enbalajean kontsumo-produktuetan erabiltzen diren jatorri fosileko soluzioak ordeztuko dituzte produktu horiek.
Soluzio zirkular, seguru eta errendimendu handikoak
Ekimenak, VTT Technical Research Centre of Finlandek koordinatzen baitu, zortzi herrialdetako 12 bazkide ditu. Helburua da bermatzea soluzio berriek industriaren eta kontsumitzailearen estandarrak betetzen dituztela errendimenduari, segurtasunari eta jasangarritasunari dagokienez.
Gainera, zirkulartasuna handituko da, aukera emango baitu azal-hondakinak beste aplikazio erabilgarri batzuetara bideratzeko; orain erre ohi dira energia sortzeko. Horrek ahalmena du urtean 18 milioi tona CO2 isurtzea saihesteko eta 490.000 tona zur artifizialeko produkturen birziklapena hobetzeko EBn.
Itsasgarriak eta estaldurak eguneroko kontsumorako produktuen zati integral bat dira. Baina, gaur egun merkatuan dauden itsasgarri eta estaldura gehienak nagusiki jatorri fosileko produktu petrokimikoak erabiliz fabrikatzen dira, eta hori Europar Batasunak herritarren osasuna eta ongizatea eta ingurumena babesteko duen helburuaren aurka doa.
SuperBark ekimenean lantzen ditugun garapenak
Proiektuaren barruan, honako hauek garatuko dira, besteak beste:
- Itsasgarrietarako eta estalduretarako osagai biooinarrituak, industriako zur bigunaren azaletik eratorriak, erauzketa alkalinorako eta mintzez lagundutako bereizketarako teknologia berriak erabilita.
- Azaletik ateratako polifenoletatik eratortzen diren eta % 95etik gora oinarri biologikoa duten itsasgarriak, zur kontratxapaturako, partikula-tauletarako eta dentsitate ertaineko zuntz-tauletarako.
- Azalarekin egindako nanozuntzetatik eta zelulosa-polifenoletatik eratortzen diren eta % 95etik gora oinarri biologikoa duten estaldurak, zur kontratxapatuzko eta paperezko ontzietarako.
- Itsasgarriak eta estaldurak eskalatzen eta merkatuan integratzen laguntzeko tresna digitalak.
Proiektuak Oinarri Biologikoko Europa Zirkular baterako Enpresa Komunaren (CBE JU) eta haren kideen laguntza du. Europar Batasunak finantzatua. Adierazitako ikuspuntuak eta iritziak egilearenak edo egileenak baino ez dira, eta ez dituzte nahitaez islatzen Europar Batasunarenak edo CBE JUrenak. Ez Europar Batasuna, ez CBE Enpresa Komuna ezin dira hartu haien erantzuletzat.
