Segurtasun- eta berrikuntza-bermea eraikuntza industrializatuan: ETAk eta TCak

TECNALIAren laguntzarekin, ETAak eta TCak: segurtasun- eta berrikuntza-bermea eraikuntza industrializatuan

Europako Ebaluazio Teknikoak (ETA edo European Technical Assessment) eta egokitasun teknikoari buruzko agiriak, hala nola TECNALIAk ematen duen Technical Conformity Report (TC) agiria, funtsezkoak dira Europan eraikuntza industrializatua garatzeko. Bermatzen dute eraikuntza-obrei eskatzen zaizkien segurtasun- eta kalitate-baldintza zorrotzak betetzen dituztela eraikuntza-eredu honetan erabilitako produktuek.

Eraikuntza industrializatuak onura ugari eskaintzen ditu, hala nola elementuak obrarekiko paraleloan fabrikatzean lanak azkarrago egitea, eta, horrela, denbora eta kostuak murriztea. Gainera, produktuak ingurune kontrolatuetan ekoizten direnez, kalitate handia, akats gutxiago eta baliabideen erabilera efizienteagoa izatea bermatzen da, eta, horren ondorioz, emaitza jasangarriagoa da. Halaber, ingurumen-inpaktu txikiagoa eragiten da eraikitzen den gunean. Teknologiari esker, eraikuntza industrializatuak diseinuak pertsonalizatzeko aukera ematen du, proiektu modular estandarizatuetan soilik aplikatzen delako pertzepzioa badago ere.

Produktu prefabrikatuen sorta zabala erabiltzen du, eta ebaluazio teknikoak behar dira haien kalitatea eta segurtasuna bermatzeko. Produktu hauek nabarmentzen dira:

• Elementu prefabrikatuak: hormigoizko panelak, metalezko egiturak eta mihiztatzeko prest dauden hormak.
• Modulu bolumetrikoak: unitate osoak (adibidez, gelak, komunak edo sukaldeak).
• Itxitura-sistemak: fatxada arinak eta aireztatuak, besteak beste.
• Zimendu prefabrikatuak: azkar instalatzeko diseinatutako zimendu-soluzioak.
• Instalazio-sistemak: moduluetan aurrez instalatutako elektrizitate-, iturgintza- eta klimatizazio-eroanbideak.

TECNALIAk fabrikatzaileei laguntzen die arau-beharrak identifikatzen eta TC eta ETA agiriak lortzen

TECNALIAk fabrikatzaileei laguntzen die arau-beharrak identifikatzen eta TC eta ETA agiriak lortzen. Ikuspegi hori funtsezkoa da zenbait sektoretan (hala nola osasuna, hezkuntza eta bulegoak), funtsezkoak baitira azkartasuna, efizientzia eta kalitate kontrolatua.

1. Produktu prefabrikatuen kalitatea bermatzea: osagaien estandarizazioa eta kalitatea da arrakastaren gakoa eraikuntza industrializatuan. ETA eta TC ebaluazio-agiriek bermatzen dute arau harmonizaturik ez duten produktu prefabrikatu eta modularrek zenbait alderdi betetzen dituztela, hala nola egiturazko segurtasuna, iraunkortasuna, suaren aurkako erresistentzia eta isolamendu termiko eta akustikoa. Horrek bermatzen du produktuak gai direla obretan mihiztatzeko eta estandar altuenak betetzen direla.

2. Berrikuntza eta teknologia berriak bultzatzea: modularitateak eta prefabrikazioak azkar eboluzionatzen duten ingurune batean, ETA eta TC ebaluazio-agiriek funtsezko zeregina betetzen dute, produktu berritzaileak Europan merkaturatzea errazten baitute. Arau tradizionaletan sartzen ez diren material eta sistemen kasuan, ebaluazio horiek ziurtatzen dute saiakuntza eta ebaluazio tekniko zorrotzak gainditu dituztela, material eta produktu tradizionalek jasaten dituzten arauak bezain zorrotzak edo zorrotzagoak.

TECNALIAk ekarpen erabakigarria egiten du esparru horretan: fabrikatzaileei laguntzen die estali gabeko arau-beharrak identifikatzen, eta TC eta ETA agiriak ematen ditu produktu berrietarako; ondorioz, merkatuan teknologia berritzaileak onartzen laguntzen du.

3. Ekoizpenaren kontrola: eraikuntza industrializatuak berezko duen fabrikazio seriatuan, ezinbestekoa da osagai bakoitzak kalitatea konstante mantentzea. Produkzio-kontrolen ebaluazio teknikoaren esparruan, egiaztatzeak bermatzen du modulu prefabrikatuek segurtasun- eta kalitate-eskakizunak betetzen dituztela produkzio-fase guztietan.

TECNALIAko laborategiek funtsezko zeregina betetzen dute ebaluazio- eta ziurtapen-esparru zorrotza ematen dutelako. Horri esker, fabrikatzaileek ekoizpen-prozesuak hobetu ditzakete, eta produktua sendo eta fidagarria dela bermatzen da.

4. Europako araudiak betetzea eta egiturazko segurtasuna: segurtasuna funtsezkoa da eraikuntza industrializatuan. TC eta ETA ziurtagiriek baliozkotzen dute egitura-produktu prefabrikatuek estatuetako eta/edo Europako araudiak betetzen dituztela, eta bermatzen dute balio-bizitza osoan erresistentzia dutela suteen, haize-kargen, sismoen eta muturreko beste baldintza batzuen aurka.

TECNALIAk egindako erresistentzia- eta iraunkortasun-saiakuntzei esker, produktu horien portaera ebalua daiteke, eta berma daiteke estandarrik zorrotzenen barruan mantentzen direla.

5. Gardentasuna eta konfiantza Europako merkatuan: ebaluazio teknikoekin (TC edo ETA) ziurtatutako produktuak erabiltzeak gardentasuna eta konfiantza ematen die fabrikatzaileei, arkitektoei, sustatzaileei eta azken erabiltzaileei, eta produktu horiek Europar Batasun osoan merkaturatzea errazten du.

TC eta ETA ziurtagirien garrantzia

TC eta ETA ziurtagiriak, TECNALIAren esperientziaren eta lan berritzailearen babesa baitute, funtsezkoak dira eraikuntza industrializatua eraikuntza-eredu jasangarri, seguru eta efiziente gisa finkatzeko. Ebaluazio horiek, produktu prefabrikatuen kalitatea bermatzeaz gain, teknologia berriak onartzen laguntzen dute etengabe aldatzen ari den sektore honetan.