“Zuraren eta altzarigintzaren sektoreko enpresen zerbitzurako instalazio bat izatea da helburua”
Instalazio pilotu berri bat jarri dugu abian, Espainian parekorik ez duena, zurezko panelak eta zuraren deribatuak garatzeko.
Instalazio pilotu bat eraiki dugu Azpeitian (Gipuzkoa) ditugun instalazioetan, zurezko oholak eta zuraren deribatuak garatzeko eta ekoizteko, Andritz eta Imal enpresekin lankidetzan. Instalazio pilotuak 350 m2-ko azalera du; zurezko produktuen laginak ekoitzi eta ebaluatu ahal izango ditu, eta pilotu-eskalan testatu 500x500 mm-ko paneletan.
Zuraren eta altzarigintzaren sektoreak produktu berriak lortzea eskatzen du, bai eta egungoen prestazio berdinak dituzten lehengai alternatibo jasangarriagoak ere. Horretarako, ezinbestekoa da probak egitea eta emaitzak baliozkotzea, merkaturatu aurretik.
Instalazioak hau du helburu: zuraren eta altzarien sektoreko enpresen zerbitzurako instalazio bat izatea, zeina erabat hornituta baitago zura tratatzeko, ezpaltzeko, fintzeko eta zur-zuntza lortzeko ekoizpen-prozesu osoa osatzeko, bai eta isolatzaileak eta taulak fabrikatzea, ezaugarritzea eta haien prestazioak ebaluatzea ere. Horrela, TECNALIA arlo horretako erreferentea izango da Espainian, instalazioak paregabeak eta aitzindariak baitira.
Instalazio pilotua; zuntzak fintzea
Instalazioak zuntzak fintzeko prozesuak egiten lagunduko die enpresei, zuntz egokiak lortzeko kalitate oneko lehengaiak zenbait iturritatik sor ditzaten: produktu lignozelulosiko alternatiboetatik (hala nola zur landugabea), produktu birziklatuetatik eta zuntz egokiak lortzeko beste nekazaritza-produktu batzuetatik.
Instalazio pilotu honen ikuspegi garrantzitsu bat itsasgarrien ekoizleei eskain diezazkiekeen aukerak dira: suaren kontrako soluzioak, katalizatzaileak, bestelako produktu kimikoak eta toxikotasun txikiko aglutinatzaileak eta su-atzeratzaileak erabiltzeko joera diren teknologia berriak baliozkotzeko osagaiak, bai eta produktu naturalen propietateak hobetzeko gehigarri efizienteagoak ere.
Halaber, birziklagarritasun-teknologiak ere aztertuko dira, produktuen zirkulartasuna areagotzeko eta prozesu osoaren CO2 emisioak murrizteko.
Enpresekiko nazioarteko lankidetza
Andritz eta Imal sektoreko enpresen eskutik, produktuak baliozkotzeko tresna bereziak erabiltzeko aukera eskainiko dugu. Andritzen fintze-ekipoa zein Imalen kolatzeko ekipoa ekipamendu bereziak dira, sektorean puntakoak.
Zehazki, instalaziorako bereziki diseinatutako ekipamendua izango du instalazioak, hala nola Imalen kolagailua, zeina modu esklusiboan diseinatu baita TECNALIArentzat (ez da ekipo piloturik fabrikatzen, eta ekoizpen industrialetarako baino ezin dira aurkitu), bai eta haren Labformer ekipoa, zeinak 500x500 mm-ko laginak ekoizten baititu, eta haren prentsa ere.
Bestalde, Andritzen fintze-ekipoak, oso moldakorra denez, aukera ematen du askotariko lehengai-iturriak ebaluatzeko, material gutxi erabiliz eta ekoizpen-lote handiak egin beharrik gabe, industria honetako ekoizpen-prozesuetan sartu nahi diren material berriak testatzeko, hala nola plastikoak eta ehunak.
