Javier Coleto doktorea
Mugikortasun jasangarriaren arduraduna
Teknologia eta negozio-eredu berriak garatzen lan egiten dugu, etorkizunean ingurumen-inpaktu txikia duen mugikortasun-agertoki baterantz egiten laguntzeko, zeina konektatua, efizientea, segurua, adimenduna eta inklusiboa izango baita. Testuinguru horretan, mugikortasun-sistemen balio-kate industrialera ez ezik administrazioetara, mugikortasun-kudeatzaileetara eta erabiltzaileetara ere bideratzen dugu gure jarduna.
Zehazki, lurreko zein aireko garraio-ibilgailuen, komunikazio-sistemen eta energia-azpiegituren hobekuntzan ipintzen dugu arreta, baita hirietako eta hiriarteko ekosistemetan duten elkarreraginean eta integrazioan ere.
Hauek dira gure helburuak:
- Garraio- eta mugikortasun-sistemen efizientzia hobetzea.
- Ingurumen-kalitatea hobetzea, energia alternatiboak erabiliz.
- Mugikortasun jasangarriko ereduetarantz egitea, hiri- eta metropoli-inguruetan.
Gure eskaintza
Elektrifikazio-soluzioak eskaintzen ditugu industriarako, lurreko eta aireko garraioko ibilgailuentzat, hibridoak edo erabat elektrikoak (full-electric), edota ibilgailu arinak eta pertsonak garraiatzeko zein erabilera industrialeko ibilgailu astunak.
Powertrain eta drivetrain arkitektura berrien diseinuan eta garapenean jarduten dugu batik bat, zeinak oso efizienteak baitira, ibilgailuaren funtzio nagusien sistema elektronikoetan kontrol-algoritmia ezartzeko dugun espezializazioari esker, eta arreta berezia ipintzen dugu propultsio-sistemetan.
Era berean, esperientzia handia dugu ingeniaritza mekanikoan eta materialetan, eta, horri esker, ibilgailuak arintzeko soluzioak eskain ditzakegu, hainbat materialetako estrategiak baliatuz eta funtzionalitate berriak txertatuz, hala nola sentsoreak, sistema elektronikoak edo komunikazio-sistemak egituran integratzea, inprimaketa funtzionaleko teknologien edo nanoteknologien bidez. Balio teknologikoaren proposamena osatzeko, ibilgailuen eta floten osasun-egoeraren kudeaketa integratua eskaintzen dugu, mantentze-lanak egiteari eta gure soluzioen jarduna hobetzeari begira.
Automatizazio-soluzioak garatzen ditugu, ibilgailu-mota desberdinen efizientzia eta segurtasuna hobetzera bideraturik, hala nola banakako eta taldeko garraio-sistemak, edo logistikarako eta eragiketa berezietarako industria-ibilgailuak.
Gure sistema automatikoak sentsoreen seinaleak, ingurunearen pertzepzioa eta nabigazioa biltzen dituen arkitektura modularrean daude oinarriturik, eta denbora errealean hartzen dituzte ibilgailua gidatzeko erabakiak, bai zirkulazio bereiziko egoeretan –hala nola portu edo aireportuetan–, bai zirkulazio partekatuko egoeretan –hiri-inguruneetan, kasu–.
Hainbat automatizazio-maila ezartzen ditugu ibilgailuetan, hala nola gidatzen laguntzeko sistemak (2. maila), kontrol partekatuko teknologiak, edo ibilgailu guztiz autonomoak (5. maila), zeinek ibilgailua kontrolatzeko berezko teknologiak baitituzte, sentsoreen, kameren eta nabigazioaren soluzio komertzialak eta aurreratuak integraturik.
Etorkizuneko hiri-mugikortasun jasangarri eta adimendunerako soluzioak garatzen espezializatu gara, zerbitzuok karbono- eta ingurumen-aztarnarik izan ez dezaten. Gure aireko ibilgailua erabat autonomoa eta elektrikoa da, eta bereziki garatua da hiri- eta metropoli-inguruneetan pertsonak garraiatzeko eta logistikarako. Kontrol elektronikoko teknologietan oinarritua da, bai hegaldi-aginteetarako eta sistemetarako, bai ibilgailuaren potentzia nagusirako. Eta, horretaz gainera, abantaila aerodinamiko eta egonkortasun-abantaila interesgarriak eskaintzen ditu.
Teknologia propio horiek garapen azkarrak egitea ahalbidetzen duten diseinu-ingurune birtualetan garatuak dira. Hori horrela, hiriko aire-ibilgailuen tipologia ugaritan egokitu eta integratu daitezke, eta, horri esker, pertsonen mugikortasunarekin eta logistika-eragiketekin loturiko aukera zabal bati erantzun ahalko zaio efizientzia handiz, hala hiri-inguruneetan nola ingurune berezietan.
Ingurumen-inpaktu apaleko energia-soluzioak eskaintzen ditugu sarean kargatzeko eta integratzeko azpiegiturarako; esate baterako, energia-iturri berriztagarriak txertatzea –fotovoltaikoa, adibidez–, ibilgailu elektrikoa integratzea sare elektrikoaren kudeaketa operatiborako biltegiratze-elementu banatu gisa, azkar birkargatzeko sistemak, biltegiratze geldikorreko sistema berriak, edo H2-a on-site sortzea etorkizunean zero emisio izango dituzten ibilgailuak kargatzeko azpiegitura hedatzeko.
Era berean, potentziako eta bihurketako elektronika-soluzio berriak biltzen ditugu, baita energia-iturri berriztagarriak ere ibilgailu hibrido eta elektrikoetan.
Teknologia eta negozio-eredu berriak garatzen lan egiten dugu, etorkizunean ingurumen-inpaktu txikiko mugikortasun-agertoki baterantz igarotzen laguntzeko, zeina konektatua, efizientea, segurua eta inklusiboa izango baita.
Mugikortasun-azpiegitura eta -sistema berriak integratzen lan egiten dugu, hala nola ibilgailuekiko azpiegitura- eta interakzio-sistemetan, zirkulazioa eta mugikortasuna kudeatzeko sistemetan, hiri- eta eskualde-plangintzan, kargatzeko azpiegituretan, intermodalitatean eta azpiegitura kritiko adimendunetan (aireportuak, geltokiak, aparkalekuak).
Espezializaturik gaude Big Data analitikara aplikatutako adimen artifizialeko tekniketan (Machine Learning, adibidez), eta, horri esker, hainbat eratako egitekoei heldu diezaiekegu: garraio-sistema adimendunak hedatzea, azpiegiturak kudeatzea, mugikortasun- eta logistika-plan berriak aztertzea eta aplikatzea, edo besteak beste hiri adimendunean integratutako sistema intermodalak (gure Smart Mobility Lab plataformaren bidez, zeinari esker bizkor eta modu efizientean prototipatu baitaitezke hiri eta hiriarteko soluzio berriak).
Horri guztiari esker, eta Safety & Security teknologiekin konbinaturik –hala nola zibersegurtasunari aplikatutako teknikak–, komunikazio seguruen inguruneetan lan egiten dugu, ibilgailu konektatua, autonomoa eta ibilgailu partekatua sustatzeko euskarri gisa, baita Mobility as a Service (MaaS) eta halako kontzeptuak hedatzeko ere.
